Diş əti qanayırsa: iltihabın ilk əlamətləri

Ağızdan pis qoxu gəlirsə və dişləri fırçalayarkən qan görürsünüzsə, bu, diş əti iltihabının ilkin mərhələsidir. Çox gec olmadan stomatoloqa müraciət etmək lazımdır — əks halda proses dişlərin laxlamasına və itirilməsinə səbəb ola bilər.

Niyə diş əti qanayır?

Əsas səbəb diş ərpi və daşlarıdır. Qidalandıqdan sonra dişlərdə qalan qida qalıqları bakteriyaların çoxalmasına şərait yaradır, ərp zamanla sərtləşərək daşa çevrilir. Daş diş ətinin kənarını qıcıqlandırır və iltihab başlayır. Demək olar ki, hər kəsdə müəyyən dərəcədə diş daşı və diş əti problemi olur; ağız gigiyenasına diqqət edən insanlarda da bu vəziyyətə rast gəlinir.

Hansı əlamətlərə diqqət etməli?

• fırçalama və ya yemək zamanı qanama;
• ağızdan pis qoxu və metal dadı;
• diş ətinin qızarması və şişməsi;
• yemək zamanı ağrı;
• dişlərin boyun hissəsinin açılması və laxlama.

Müalicə olunmasa nə baş verir?

İltihab diş ətindən dişi saxlayan toxumalara və sümüyə keçir — gingivit parodontitə çevrilir. Diş əti çəkilir, dişlər laxlayır və sonda itirilə bilər. Diş daşlarının təmizlənməməsi dişlərin çəkilməsinə qədər gedən yolun başlanğıcıdır, amma çoxumuz bunu bilmirik.

Nə etmək lazımdır?

1. Stomatoloqa müraciət edin və diş daşlarını peşəkar təmizlətdirin.
2. Həkimin tövsiyəsi ilə diş əti müalicəsini — Vector aparatı, FotoSan və ya küretaj — tamamlayın.
3. Evdə gündə iki dəfə fırçalayın və diş sapından istifadə edin.
4. Peşəkar təmizliyə müntəzəm gəlin.

Ətraflı: diş əti müalicəsi və diş daşlarının təmizlənməsi.

Məqalə maarifləndirici xarakter daşıyır və həkim müayinəsini əvəz etmir.